ແອເອເຊຍມາເລເຊຍ ຈະເລີ່ມຖ້ຽວບິນໃນປະເທດຕັ້ງແຕ່ເດືອນກໍລະກົດ

127

ຕາມຂ່າວຈາກ ກົວລາລຳເປີ, ວັນທີ 15ມິຖຸນາ, ທ່ານ ໂທນີ ເຟີນັນເດສ, ປະທານ ເຈົ້າໜ້າທີ່ ບໍລິຫານ(CEO)ສາຍການບິນ ແອເອເຊຍ ມາເລເຊຍ (Air Asia Malaysia Airlines)ເປີດເຜີຍວ່າ: ຈະເລີ່ມຖ້ຽວບິນ ໃນປະເທດ ທຸກເສັ້ນທາງ ນັບຕັ້ງແຕ່ເດືອນກໍລະກົດ ເປັນຕົ້ນໄປ ເນື່ອງຈາກ ລັດຖະບານ ມາເລເຊຍ ຫລຸດຜ່ອນ ມາດຕະການ ຈຳກັດ ການເດີນທາງ ເພື່ອຄວບຄຸມ ເຊື້ອພະຍາດ ໂຄວິດ-19

ແຕ່ຄວາມຖີ່ ຂອງຖ້ຽວບິນ ຈະຂຶ້ນຢູ່ກັບ ຄວາມຕ້ອງການ ເດີນທາງຂອງຜູ້ໂດຍສານ ເນື່ອງຈາກ ຂະນະນີ້ ມີຄວາມຕ້ອງການ ເດີນທາງ ດ້ວຍເຮືອບິນ ສູງຂຶ້ນ ຄົນຕ້ອງການເດີນທາງ, ຕ້ອງການເຮັດວຽກ ແລະ ຕ້ອງການກັບເຮືອນ. ສ່ວນລັດຖະບານ ມາເລເຊຍ ອະນຸຍາດ ໃຫ້ເດີນທາງ ລະຫວ່າງ ລັດໄດ້ ຕັ້ງແຕ່ອາທິດກ່ອນ ຕາມມາດຕະການ ຟື້ນຟູເສດຖະກິດ ທີ່ໄດ້ຮັບຜົນກະທົບ

ຈາກໂຄວິດ-19 ຫລັງຈາກ ປະກາດວ່າ ປະສົບຜົນສຳເລັດ ໃນການຄວບຄຸມ ພະຍາດໄດ້ແລ້ວ.ນອກນີ້ ຍັງມີແຜນຂະຫຍາຍ ທຸລະກິດ ຂົນສົ່ງສິນຄ້າ ກະສິກຳ ໃນຮູບແບບໃໝ່ ໃນອີກ 3-4 ເດືອນຕໍ່ໜ້າ ເພື່ອຂະຫຍາຍ ຕະຫລາດ ໃຫ້ແກ່ຊາວ ກະສິກອນ ໃນມາເລເຊຍ ໄປຍັງຕ່າງປະເທດ.

ຮຽບຮຽງຂ່າວໂດຍ ສະໄຫວ | ຂປລ