ອິນເດຍສັ່ງປິດເມືອງອີກ 2 ອາທິດ ສະກັດກັ້ນໂຄວິດ-19

116

ອິນເດຍ ສັ່ງປິດເມືອງອີກ 2 ອາທິດ ສະກັດກັ້ນໂຄວິດ-19
ຂໍ້ມູນຈາກ ກະຊວງ ສາທາລະນະສຸກ ອິນເດຍ ເມື່ອບໍ່ດົນມານີ້ ລະບຸວ່າ: ລັດຖະບານ ອິນເດຍ ປະກາດມາດຕະການປິດເມືອງ ໃນຫລາຍເມືອງ ເປັນເວລາ 2 ອາທິດ ເພື່ອສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ຂະນະທີ່ ຕົວເລກຜູ້ຕິດເຊື້ອ ລາຍວັນເກືອບຮອດ 20.000 ຄົນ.

ໃນໄລຍະ 24 ຊົ່ວໂມງ ຜ່ານມາ ອິນເດຍ ມີລາຍງານຕົວເລກຜູ້ຕິດເຊື້ອໂຄວິດ-19 ລາຍໃໝ່ 18.522 ຄົນ ຫລຸດລົງບໍ່ຫລາຍ ຈາກສະຖິຕິທີ່ຜ່ານມາ ສູງເຖິງ 19.906 ຄົນ ແລະ ມີຜູ້ຕິດເຊື້ອ ສະສົມ 550.000 ກວ່າຄົນ ຕາມຫລັງ ສ.ອາເມລິກາ, ບຣາຊິນ ແລະ ຣັດເຊຍ. ສ່ວນຕົວເລກ ຜູ້ເສຍຊີວິດໃນ ອິນເດຍ 16.000 ກວ່າຄົນ.

ນອກນີ້ ຍັງພົບຫລາຍເມືອງ ພົບການແຜ່ລະບາດ ອີກຄັ້ງ ໂດຍສະເພາະໃນ ລັດອັດສຳ ທາງຕາເວັນອອກສ່ຽງເໜືອ ຂອງປະເທດ ພວມຜະເຊີນກັບນ້ຳຖ້ວມ ຄັ້ງໃຫຍ່ ປະຊາຊົນ 1 ລ້ານກວ່າຄົນ ຕ້ອງຍົກຍ້າຍອອກຈາກເຮືອນ ໄດ້ສັ່ງປິດເມືອງ ຢ່າງເຂັ້ມງວດ ໃນເມືອງກູວາຮາຕິ ພົບການຕິດເຊື້ອ 175 ຄົນ ຖືວ່າເປັນກໍລະນີໜ້າເປັນຫ່ວງຫລາຍ.

ຂະນະດຽວກັນ ລັດທະມິນາທູ ທາງພາກໃຕ້ ໄດ້ສັ່ງຂະຫຍາຍມາດຕະການປິດເມືອງເຈນໄນ ທີ່ເປັນເມືອງ ອຸດສາຫະກຳ ລົດໃຫຍ່ ເປັນເວລາ 5 ວັນ.

ຮຽບຮຽງໂດຍ: ສະໄຫວ | ຂປລ