ຈັບຄາລົດປາຣາໂດ້ ຂົນຢາໄອສ໌ 72 ກິໂລ – ເຮໂຣອິນ 2 ແທ່ງ

110

25 ກໍລະກົດ ຜ່ານມາ, ພະແນກຕໍາຫຼວດເສດຖະກິດ ກອງບັນຊາການ ປກສ ແຂວງວຽງຈັນ ສົມທົບກັບ ກອງບັນຊາ ການ ປກສ ເມືອງວັງວຽງ ໄດ້ສະກັດລັດກວດຄົ້ນ ລົດປາຣາໂດ້ ສີປອນທອງ ໝາຍເລກທະບຽນ ກສ 8342 ກໍາແພງນະຄອນ ເຊິ່ງເປັນລົດເປົ້າໝາຍຄະດີຢາ ຢູ່ເສັ້ນທາງເລກທີ່ 13 ເໜືອ ເຂດບ້ານນາດາວ ເມືອງວັງວຽງ ແຂວງວຽງຈັນ

ຜ່ານການກວດກາພາຍໃນລົດ ພົບຢາເສບຕິດ ປະເພດຢາໄອສ໌ ຈໍານວນ 72 ຖົງ ເທົ່າ 72 ກິໂລກຼາມ, ເຮໂຣອິນ ຈໍານວນ 2 ແທ່ງ ກັບ 1 ຖົງ,ໂທລະສັບ 6 ເຄື່ອງ, ຟາດສະປອດ2ຫົວ, ເງິນ 2.399.000 ກີບ, 18.250 ບາດ ພ້ອມທັງກັກຕົວຜູ້ຖືກຫາໄດ້ 3 ຄົນ ກ່ອນສົ່ງໃຫ້ເຈົ້າໜ້າທີ່ຕໍາຫຼວດວິຊາສະເພາະດໍາເນີນການສືບສວນ-ສອບສວນດໍາເນີນຄະດີ.

ພະແນກຕໍາຫຼວດ ສະກັດກັ້ນ ແລະ ຕ້ານຢາເສບຕິດ ໃຫ້ຮູ້ວ່າ: ຜູ້ຖືກຫາທັງ 3 ຄົນ ຊື່ ທ້າວ ເຊິນລູ ອາຍຸ 34 ປີ ຢູ່ບ້ານຜົ້ງສາລີ ເມືອງຜົ້ງສາລີ ແຂວງຜົ້ງສາລີ, ທ້າວ ເຊັງໄຮພົງ ແລະ ທ້າວ ກາງ ສຽວຮົ່ວ ເຊື້ອຊາດ ສັນຊາດຈີນ. ຄະດີດັ່ງກ່າວ ພະແນກຕໍາຫຼວດ ສະກັດກັ້ນ ແລະ ຕ້ານຢາເສບຕິດ ພວມດໍາເນີນການສືບສວນ-ສອບສວນຂະຫຍາຜົນຜູ້ຮ່ວມຂະບວນການດຽວກັນ ເພື່ອຕິດຕາມຕົວໄປດໍາເນີນຄະດີຕາມກົດໝາຍ.